KORRIDORI I HEKURT – Gazmend Ejupi

Titulli: “Korridori i Hekurt”
Kurator: Gazmend Ejupi
Instalimi: Open Art Gallery
Përkrahja teknike: Trainkos
Prodhuar nga: Rrjeti Ballkanik për Gazetari Hulumtuese, BIRN

Brenda Galerisë së Reporting House, “Korridori i Hekurt” shpaloset si një përballje me kujtesën, dëshminë dhe materialitetin e pamëshirshëm të mërgimit. Në muret e ekspozitës, një fragment metalik nga vagoni origjinal i refugjatëve të Bllacës 1999 vendoset në hapësirë si një plasaritje e gjallë; një objekt, çeliku i ftohtë i të cilit bart historinë, i zhveshur nga çdo element druri apo ornament. Metali zbulon thjeshtësinë brutale të zhvendosjes: kufijtë, pritjet e mbijetesën. Instalacioni gjithashtu fton publikun të sjellë artefakte personale nga përvoja e tyre gjatë dëbimit të gati gjysëm milion njerëzve që u bllokuan në Bllacë 1999.

Një sistem binarësh, i instaluar përgjatë mureve të ekspozitës, e shndërron hapësirën në një kalim performativ. Këta binarë nuk janë simbolikë; ata janë funksionalë. Vizitorët ftohen të tërheqin dhe të drejtojnë fragmentin e vagonit, si dhe të pozicionojnë artefaktet e tyre përgjatë instalimit, duke zhvendosur fizikisht kujtesën nëpër hapësirë. Ky veprim pasqyron mënyrën se si bartet kujtesa: nga njerëzit, përmes lëvizjes dhe vullnetit kolektiv.

I kuruar nga Gazmend Ejupi, instalacioni e rishkruan brendësinë e Reporting House; një hapësirë e rrënjosur në arkiva mediatike dhe në tregimin e së vërtetës; si një korridor të përkohshëm kthimi. Ndërsa struktura metalike lëviz, ajo ndez një rikujtim të tensionit të përjetuar të vitit 1999, kur mijëra njerëz qëndronin brenda vagonëve të ngjashëm prej çeliku, të pezulluar mes dëbimit dhe shpresës.

“Steel Corridor/Korridori i Hekurt” e shndërron Reporting House në një hapësirë ku e kaluara nuk qëndron e palëvizshme. Ajo lëviz nëpër galeri, e udhëhequr nga publiku, duke këmbëngulur që të rikujtohen historitë e Bllacës; një gjest, një tërheqje, një artefakt i ndarë, kontribuon në reflektim kolektiv që në këtë rast është sjellë përmes një intervenimi kuratorial.